Yangiliklar

OTM va maktab hamkorligi: Rektorlar maktab bitiruvchilari bilan uchrashdi

Andijon shahridagi 1-umumtaʼlim maktabida viloyatdagi davlat oliy taʼlim muassasalari rektorlarining 11-sinf bitiruvchilari bilan ochiq muloqoti oʻtkazildi.

Unda dastlab Andijon viloyati hokimining yoshlar siyosati, ijtimoiy rivojlantirish va maʼnaviy-maʼrifiy ishlar boʻyicha oʻrinbosari Komiljon Komilov soʻz olib, soʻnggi yetti yilda oliy taʼlim tizimida yoshlarga yaratilayotgan sharoitlar, oʻzlarining isteʼdodini namoyon qilish uchun mavjud imkoniyatlar haqida soʻzladi.

Shundan soʻng, har bir rektor oʻzi rahbarlik qilayotgan ilm dargohi, mavjud yoʻnalishlar, kirish imtihonlari, qabul va oʻqish jarayonlari haqida maʼlumot berdi.

Ochiq muloqot davomida bitiruvchilari oʻzlarini qiziqtirgan savollariga rektorlardan javob oldilar.

Uchrashuvida Andijon mashinasozlik instituti rektori, texnika fanlari doktori Umid Turdialiyev ham oʻquvchilar bilan samimiy muloqot oʻtkazib, mashinasozlik, intellektual boshqaruv, iqtisodiyot, energetika va yoʻl muhandisligi sohasiga qiziquvchi oʻquvchilarni institutda oʻtkaziladigan “Ochiq eshiklar kuni”ga taklif qildi.