Yangiliklar

Oybek Tursunov — “El-yurt umidi” jamgʻarmasining stipendiya tanlovi gʻolibi boʻldi

Oʻzbekiston Respublikasi Prezidenti huzuridagi Davlat boshqaruvi akademiyasida “El-yurt umidi” jamgʻarmasi oʻtkazgan 2023-yilgi ikkinchi stipendiya tanlovi gʻoliblariga sertifikatlarni tantanali topshirish marosimi boʻlib oʻtdi.
“Iqtidorli yoshlar: Yangi Oʻzbekiston istiqboli uchun birlashamiz” shiori ostida oʻtgan tadbirda Jamgʻarma Vasiylik kengashi aʼzolari, sanʼatkorlar, faylasuf, adabiyotshunos va taniqli akademik-olimlar, Respublika Maʼnaviyat va maʼrifat markazi targʻibotchilari ishtirok etishdi.
Tadbirda soʻz olganlar mamlakatimizda amalga oshirilayotgan islohotlarni innovatsion va ilgʻor xorijiy tajribalar asosida qoʻllab-quvvatlaydigan yetuk malakali kadrlarga ehtiyoj kun sayin ortib borayotganligini taʼkidlashdi. Bu borada esa jamgʻarma stipendiya tanlovlarida gʻolib boʻlgan yoshlarga ulkan ishonch bildirildi.

Qayd etish lozim, 2023-yilgi 2-ochiq stipendiya tanlovida munosib qatnashgan va yuqori ballar toʻplagan 119 nomzodlar “Jamgʻarma stipendiati” deb eʼtirof etildi hamda xorijda Top-300 reytingli universitetlarda tahsil olish uchun toʻliq grantni qoʻlga kiritdi.
Ular qatorida Andijon mashinasozlik instituti Avtomobilsozlik kafedrasi tayanch doktoranti Oybek Tursunov ham bor.
U Italiyaning Turin Politexnika Universitetida “Digital Skills for Sustainable Societal Transition” (Barqaror ijtimoiy oʻtish uchun raqamli koʻnikmalar) oʻquv kursida oʻqib, oʻzining Transport sohasida sunʼiy intellektdan foydalish yoʻnalishida olib borayotgan ilmiy ishi uchun zarur boʻlgan bilimlarni egallab qaytishni rejalashtirgan.
Institut jamoasi Oybek Tursunovni bildirilgan yuksak ishonch va eʼtirof bilan chin qalbdan tabriklaydi hamda kelgusidagi ishlariga omad va zafarlar tilab qoladi.